FAOI RÚN

Is sraith saothair ealaíne é Faoi Rún atá suite amuigh faoin spéir i Ros Muc, agus a dhéanann iniúchadh ar an bplé idir tírdhreach, aeráid agus cultúr na háite.

Portráidí Criathraigh

Is é an t-ealaíontóir Árannach Seán Ó Flaithearta a chruthaigh Portráidí Criathraigh i bportach i gcroí-lár Ros Muc. Léiríonn siad beirt phearsa as Ros Muc; sin iad Bridget Aylward, Banríon Alaska agus an rinceoir cáilithe ar an sean-nós, Cóilín Sheáin Dharach Seoige. Tugann siad ómós don áit lárnach atá ag an bportach i saol muintir na Gaeltachta. Baineadh na portráidí amach as an bportach le sleán agus innealra, mar a bhaintear móin, agus is ionann iad agus na trínsí agus díoganna báite mórthimpeall orthu.

Scannán Portráidí Criathraigh

Tugann an gearrscannán le Joe Lee agus Ríonach Ní Néill léargas ar mar ar chruthaigh Seán Ó Flaithearta an saothar ealaíne Portráidí Criathraigh i bportach i Ros Muc. Is iad muintir Ros Muc a bhí páirteach agus a roghnaigh an bheirt phearsa atá á gcomóradh sa saothar.

Ephemera

Sníomhann an t-ealaíontóir Paul Kinsella tírdhreacha fisiciúla agus fíorúla le chéile i saothair grianghrafadóireachta a chuireann i gcás áit ina bhfuil an t-am atá caite, an t-am i láthair agus an t-am atá le teacht ag tárlú ag an am céanna. Spreagtha ag an bplean a caitheadh i dtraipisí bóthar iarainn a chur síos sa cheantar, ceistíonn a shaothar buaineacht na timpeallachta.